Komisiyo ishinzwe imyitwarire mu mpuzamashyirahamwe y’Umupira w’Amaguru ku mugabane wa Afurika (CAF), yamaze guca amande ya $10,000 buri imwe amakipe ya TP Mazembe yo muri Repubulika Iharanira Demokarasi ya Congo na Raja Casablanca yo muri Maroc, kubera ubushyamirane bwabaye mbere y’umukino wayahuje muri Werurwe uyu mwaka.
Ku wa 07 Werurwe TP Mazembe na Raja Casablanca bari bahuriye i Lubumbashi muri Repubulika Iharanira Demokarasi ya Congo, mu mukino wo kwishyura wa 1/4 cy’irangiza cya CAF Champions league warangiye Mazembe itsinze igitego 1-0.
Icyo gitego cyatsinzwe na Isaac Tshibangu ntacyo cyafashije ikipe ya TP Mazembe, kuko mu mukino ubanza wari warabereye i Casablanca yatsinzwe ibitego 2-0, bigatuma isezererwa ku giteranyo cy’ibitego 2-1.
Rutahizamu Jackson Muleka yahushije penaliti yagombaga guhesha TP Mazembe igitego cya kabiri.
Mbere y’uko umukino utangira, myugariro Iliass Hadad wa Raja Casablanca yashyamiranye na bamwe mu bafana ba TP Mazembe, ubwo bushyamirane bukaba ari bwo ntandaro yo kugira ngo amakipe yombi ahanwe.
Komisiyo ishinzwe imyitwarire muri CAF yateranye ku munsi w’ejo mbere yo gusohora umwanzuro wayo kuri uyu wa kane, yafashe umwanzuro wo guca TP Mazembe $10,000 (9,500,000Rwf) kubera “kunanirwa gucunga umutekano nk’ikipe yari yakiriye umukino.”
Raja Casablanca na yo yaciwe amafaranga nk’ayo kubera “imyitwarire idahwitse y’abakinnyi bayo byateje imvururu mu bafana ba TP Mazembe”.
