Ku butumire bwa mugenzi we wa Afurika y’Epfo, Cyril Ramaphosa, Perezida Félix Antoine Tshisekedi Tshilombo yageze i Pretoria, muri Afurika y’Epfo, mu gitondo cyo kuri uyu wa Kane mu ruzinduko rw’akazi rumara amasaha menshi.
Ageze ku kibuga cy’indege cya gisirikare, Umukuru w’igihugu cya Congo Kinshasa yakiriwe na Minisitiri w’Ububanyi n’Amahanga wungirije wa Afurika y’Epfo, Thandi Moreka nk’uko bitangazwa na perezidansi ya Congo.
Imodoka za perezida zerekeje ku nyubako ya Union Buildings i Pretoria, ahari icyicaro cya guverinoma, ahateganijwe ibiganiro imbonankubone hagati y’abakuru b’ibihugu byombi, hanyuma hagakurikiraho gusangira ifunguro.
Uru ruzinduko rugufi ni kimwe mu bishimangira ubufatanye bw’ibihugu byombi hagati ya DRC na Afurika y’Epfo, bifitanye amasezerano y’ubufatanye mu rwego rwa politiki, diplomasi, igisirikare, ndetse n’ubukungu.
Perezida Félix Tshisekedi yaherekejwe na Minisitiri w’Intebe wungirije akaba na Minisitiri w’Ingabo, Guy Kabongo, Minisitiri w’Ububanyi n’Amahanga, Thérèse Kayikwamba Wagner, na Minisitiri w’Imari, Doudou Fwamba.
Igihugu cya Afurika y’Epfo twabibutsa ko ari cyo cyari kiyoboye ubutumwa bwa gisirikare bw’Umuryango wa SADC (SAMIDRC) bwari bugamije kubuza M23 gufata Umujyi wa Goma ariko birangira ufashwe ndetse ubwo butumwa buhita bushyirwaho iherezo.
