Minisitiri w’Ingabo w’u Rwanda, Hon Juvenal MARIZAMUNDA, yatangiye uruzinduko rw’akazi rw’iminsi 3 mu Bwami bwa Maroc kuva kuri uyu wa Gatatu ushize, itariki 18 Kamena, aho yaherekejwe na Shakilla Umutoni, Ambasaderi w’u Rwanda mu Bwami bwa Maroc, Col David Mutayomba, ushinzwe imyitozo ya gisirikare muri RDF, na Lt Col Angeline Kamanzi, Umuyobozi ushinzwe isesengura mu butasi bwa gisirikare.
Uruzinduko rwatangijwe n’imihango yo gushyira indabyo ku mva ya Mohammed V, mu rwego rwo kubaha umurage w’amateka yasize ndetse n’ubuyobozi bw’umubyeyi w’ubwigenge wa Maroc.
Ku munsi wa mbere habaye inama yo mu rwego rwo hejuru ihuza intumwa z’u Rwanda na bagenzi babo bo muri Maroc, iyobowe na Abdeltif LOUDYI, Minisitiri uhagarariye umuyobozi wa guverinoma ushinzwe ubuyobozi bw’ingabo z’igihugu, yabereye ku cyicaro gikuru cy’ubuyobozi bw’ingabo z’igihugu.
Ibiganiro byibanze ku gushimangira ubufatanye mu bya gisirikare hagati y’ibihugu byombi.
Umunsi washojwe no gushyira umukono ku masezerano y’ubufatanye mu bya gisirikare hagati ya Guverinoma y’u Rwanda na Guverinoma y’Ubwami bwa Maroc nk’uko byatangajwe na Minisiteri y’Ingabo y’u Rwanda.
Aya masezerano y’ingenzi ashyiraho urwego rukomeye rw’imikoranire rwo kongera umubano mu bya gisirikare kandi ruharura inzira y’ubufatanye bwagutse hagati y’ibihugu byombi.
Uru ruzinduko rugaragaza intambwe ikomeye mu bufatanye mu bya gisirikare hagati y’u Rwanda na Maroc kandi byerekana ko ibihugu byombi byiyemeje guharanira amahoro, umutekano, n’iterambere.
