Leta Zunze Ubumwe z’Abarabu (UAE) zatangaje ko zizahagarika itangwa rya viza z’ubukerarugendo n’akazi ku benegihugu ba Uganda guhera muri Mutarama 2026, icyemezo gishobora guhungabanya gahunda yo guhererekanya abakozi, byagira ingaruka ku mafaranga yoherezwaga mu ngo, no ku bucuruzi n’ubucuruzi.
Aya mabwiriza yatangajwe binyuze mu rwego rushinzwe abinjira n’abasohoka muri Abu Dhabi, rwongeye Uganda ku rutonde rw’ibihugu birebwa n’iki cyemezo gitunguranye, birimo Afghanistan, Libya, Yemen, Somalia, Liban, Bangladesh, Cameroun, na Sudani.
Abayobozi ba UAE basobanuye ko iki cyemezo ari agateganyo kandi ko ari ukwirinda, bavuga ko bahangayikishijwe n’umutekano w’igihugu ndetse na raporo z’ubutasi z’imiyoboro icuruza abantu ibinyujije mu kubemerera kubashakira viza. Banagaragaje kandi amakimbirane ashingiye kuri dipolomasi n’umurimo ku bijyanye n’uko abakozi b’abimukira bafatwa n’uko basubira iwabo.
Iri tangazo rije nyuma y’iperereza ryakozwe na BBC ryashyize mu majwi umuturage wa Uganda, Charles Mwesigwa, rimuhuza n’umuyoboro ukoresha uburaya mu duce two muri Dubai, ibituma itangwa rya viza rigiye kurushaho kujya ryitonderwa.
Minisiteri y’uburinganire, umurimo n’iterambere ry’imibereho ivuga ko Abagande 120.459 babonye akazi mu mahanga hagati ya Mutarama 2022 na Ukuboza 2023, aho abarenga 89 ku ijana boherejwe mu Burasirazuba bwo Hagati.
Muri icyo gihe kandi, Uganda yinjije UGX miliyari 25 (miliyoni 6.5 USD) zivuye mu gutanga impushya zo gukorera hanze, gushakira abantu akazi, no kwemeza ko abakozi bashakwa bafite ubushobozi.
Ni mu gihe Abagande bakorera mu bihugu by’Abarabu birimo UAE binjiza mu gihugu agera kuri miliyari 1.4$ buri mwaka abeshaho imiryango ibihumbi kandi bakaba isoko ikomeye y’amadevize. Ihagarikwa rya viza ryegereje rivuze ko nta bakozi bashya bazoherezwa, amasezerano yamaze gusinywa ashobora guhagarikwa, kandi imiryango yashoyemo imari ishobora guhomba.
