Imodoka zisaga 24 bikekwa ko zibwe mu Bwongereza zikazanwa muri Uganda kuri uyu wa kabiri zasubijwe abayobozi b’u Bwongereza n’Ikigo cy’igihugu cy’imisoro (URA). Izi modoka zifite agaciro k’amamiliyari y’amashilingi ya Uganda zari ziganjemo izo mu bwoko bwa Range Rovers, Audi, Beattles na Lexus, zafatiwe mu mukwabu wiswe Navigation wo muri Nyakanga 2015.
Zimwe muri izi modoka bivugwa ko zatumijwe zikazanwa muri za kontineri zari zirimo za matora zo kuryamaho, mu gihe izindi ngo zafatirwaga ku mihanda.
Nk’uko umuyobozi wungirije wa Interpol muri Uganda, Oyo Nyeko yabitangaje, ngo uyu mukwabu wakozwe ku bufatanye bwa polisi, Uganda Revenue Authority ndetse n’inzego zishinzwe iperereza ku bujura bw’ibinyabiziga rwo mu Bwongereza.
Uyu muyobozi yaboneyeho kuburira abaturage abasaba kujya bagura imodoka babanje gusuzuma ko nta bibazo zifite nk’uko Chimpreports dukesha iyi nkuru ikomeza ivuga.
Komiseri mukuru wa URA, Grace Akol, mu muhango wo gusubiza izi modoka ku cyicaro cya URA ahitwa Nakawa, yishimiye ubufatanye bwiza hagati y’inzego zavuzwe haruguru bwatumye iki gikorwa cyo kuvumbura izi modoka kigenda neza.
Yavuze ko za gasutamo zifite inshingano zo kurinda Abagande gukoresha ibikoresho bitemewe birimo n’imodoka ziba zibwe.
Naho uhagarariye u Bwongereza muri Uganda, Alison Blackburne, nawe yashimiye ubufatanye bw’inzego zagize uruhare mu gufata izi modoka avuga ko bigaragaza imikoranireya hafi. Yaboneyeho gusezeranya ko u Bwongereza buzagira uruhare mu guhugura abakozi ba URA kugirango bakomeze barwanye ibyaha nk’ibi.
Mu gusoza iyi nkuru twababwira ko n’u Rwanda kuri uyu wa Mbere rwasubije u Bwongereza imodoka yo mu bwoko bwa Range Rovers nyuma yo gusubizwa iyi modoka, Bwana David Ward, impuguke mu by’iperereza ikora mu kigo cyitwa UK National Crime Agency kiri muri Kenya akaba yarashimiye ubushishozi ndetse n’ubunyamwuga bwa Polisi y’u Rwanda, ndetse n’imbaraga yakoresheje itahura iyi modoka, aho yavuze ko igihugu cye n’ubundi gisanganywe ubufatanye bwihariye na Polisi y’u Rwanda mu nzego nyinshi.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
