Uganda yitandukanije na Julia Sebutinde, umucamanza watoye arwanya ingamba zose z’agateganyo Urukiko rw’Umuryango w’Abibumbye rwategetse Israel gufata ku wa Gatanu, mu rubanza rwazanywe na Afurika y’Epfo ku byerekeye intambara yo muri Gaza.
Uhagarariye Uganda muri Loni, Adonia Ayebare, yanditse kuri X ati “Icyemezo cy’Umucamanza Sebutinde muri ICJ (Urukiko Mpuzamahanga rw’Ubutabera) ntabwo kigaragaza aho Guverinoma ya Uganda ihagaze ku kibazo cya Palesitine.” Gushyigikira abaturage ba Palesitine kwa Uganda kwagaragajwe binyuze mu buryo bwo gutora mu Muryango w’Abibumbye. ”
Afurika y’Epfo, yareze Israel muri ICJ ikorera i La Haye ku wa 29 Ukuboza iyishinjwa gukorera jenoside Abanyapalestine.
Ku wa Gatanu, ICJ yasanze ibyo Afurika y’Epfo ivuga ko Israel ikora jenoside bifite ishingiro ariko ntirwabyemeza. Urukiko rwatanze icyemezo cy’agateganyo gisaba Israel gufata ingamba zo gukumira jenoside n’itangwa ry’imfashanyo muri Gaza no kunoza ibibazo by’ubutabazi.
Umucamanza Sebutinde wo muri ICJ yatoye arwanya ingamba zose uko ari esheshatu za ICJ. Ubu ahanganye n’uburakari bw’Isi hamwe n’abakoresha imbuga nkoranyambaga bavuga ko Abagande bagomba kugira ipfunwe kubera uko yatoye.
Umunyakenya ukoresha X yagize ati: “Umucamanza Julia Sebutinde ni isoni ku gihugu cye & agasuzuguro ku kiremwamuntu. Ntabwo yatoye arwanya gusa icyifuzo cya Afurika y’Epfo, yatoye arwanya ubumuntu, ubutabera & umudendezo, urukundo n’impuhwe. Yatoye arwanya ubugingo bw’ikiremwamuntu. ”
Ati: “Julia Sebutinde ni amahano kuri twese muri Afurika, cyane cyane abagore bo muri Afurika. Yerekanye ko nta kindi usibye kuba umukozi w’abagizi na nabi b’abazayoni bo muri Israel. ”
Sebutinde niwe mucamanza wenyine wafashe icyemezo cyo kurwanya imyanzuro yafatiwe Israel.
Nubwo ariko yatoye ayirwanya, Urukiko rw’Umuryango w’Abibumbye rwategetse Israel gufata ingamba zose zishoboka kugira ngo ikumire ibikorwa bya jenoside mu bikorwa bya gisirikare ikomeje muri Gaza.
