Ukuriye igisirikare cya Algeria yasabye Perezida wa Repubulika, Abdelaziz Bouteflika kurekura ubutegetsi mu gihe imyigaragambyo y’abaturage ikomeje imusaba kubuvaho.
Gen. Ahmed Gaid Salah, asanzwe yungirije Minisitiri w’Ingabo akaba asaba Abdelaziz kwegura hakurikijwe ingingo yo mu Itegeko Nshinga.
Nk’uko BBC yabitangaje, ngo iyo ngingo yo mu Itegeko Nshinga yemera ko hatangazwa ko umwanya w’umukuru w’igihugu nta muntu uwurimo mu gihe uri ku butegetsi arembye atakibashije kuyobora igihugu.
Imyigaragambyo yamagana uyu mukuru w’igihugu w’imyaka 82 ikaba yaratangiye mu kwezi gushize ubwo yari amaze gutangaza ko aziyamamaza kuri manda ya Gatanu.
Imyigaragambyo yarakomeje na nyuma y’aho Perezida Buteflika ahinduriye imvugo akemeza ko azava ku butegetsi hagize igihinduka mu Itegeko Nshinga.
Perezida Bouteflika amaze imyaka 20 ari ku butegetsi, ariko ni gacye cyane yagaragaye mu ruhame kuva yarwara indwara y’imitsi yo mu bwonko mu mwaka wa 2013. Ubu akaba agendera mu kagare k’abamugaye.
