Mu gihe Agathon Rwasa yari mu ruhando rw’abarwanya Perezida Nkurunziza kuri manda ye ya gatatu, benshi batunguwe no kumva ko yagiye mu nteko nshingamategeko nyuma yo gutsindwa amatora yegukanwe na Nkurunziza.
Kuba Agathon Rwasa yaragiye muri Guverinoma, benshi babifashe nk’ubugambanyi, bikaba bitangazwa ko Perezida Nkurunziza yamuhaye amafaranga mbere y’uko bitangazwa ko ari we uzahagararira ishyaka CNDD FDD mu matora.
Isesengura ryakozwe n’ikinyamakuru cy’i Burundi (Burundi 24), ngo miliyoni Agathon Rwasa yahawe nizo zamuteye kugambanira abo bari mu ruhande rumwe bamagana Nkurunziza kuri manda ya gatatu bemeza ko atari yemerewe n’amategeko.
Agathon Rwasa ni umunyapolitiki, inyeshyamba yatinywaga na buri wese i Burundi ndetse yanahangayikishaga perezida Nkurunziza ubwo yari akiyoboye inyeshyamba za FNL zitavugaga n’ubutegetsi bwa Nkurunziza.
Nkurunziza ngo yabonaga ari we wenyine ushobora kumuhirika biciye mu matora, ngo biza kurangira amuhaye amafaranga ahita aca bugufi ariko ntiyabitangariza abo bari bafatanyije urugendo ari naho bahera bamwita umugambanyi.
Amakuru agera ku kinyamakuru Burundinews avuga ko ari uwitwa Bunyoni wari warahawe gahunda yo kwegera Agathon Rwasa akamucishisha make ndetse ko ari we wahawe amafaranga akayamushira kugirango atuze mu gihe abandi bakamezaga bigaragambya.
Rwasa ngo yagiye akwepa abandi, akanga gukorera mu ikipe ubwo abandi birirwaga bigaragambya, Agathon ntiyigeze yiyamamaza nk’umukandida w’ishyaka FNL benshi bazi ko aribereye umuyobozi, Agathon yiyamamarije umwanya w’umukuru w’igihugu ari ku ruhande rw’ishyaka Urunani” Abigenga- Amizero y’Abarundi”.
Aganira na BBC, Agathon Rwasa yatangaje ko abarebana n’amatora bose bagakwiye kubanza kwicara hasi bakaganira, bagacoca ibibazo biri mu baturage bakareba icyo gukora mbere yo kwinjira mu matora n’abaturage bakayakora bafite umutima utekanye.
Agathon Rwasa yari yatangaje ko atazajya mu matora mu gihe Nkuruziza azaba ayarimo, byaje kurangira ayagiyemo ndetse abonye anatsinzwe ntiyagira byinshi avuga ahubwo benshi batungurwa no kumva ko yabaye Visi Perezida wa Sena.
Kugeza ubu birakekwa ko Agathon Rwasa ashobora kuba yarinjiye muri CNDD FDD mu ibanga ko afite n’ikarita y’umunyamuryango, ko nta bindi biganiro akigirana n’abarwanya Leta ya Nkurunziza nyuma yaho bigaragariye ko ari umugambanyi.
Agathon yagiye ashinjwa ubwicanyi ubwo yari inyeshyamba, akaba yarashinjwaga ubwicanyi bwakorewe abanyamulenge b’i Gatumba, Agathon Rwasa yahakanye ibyo yashinjwaga avuga ko ari umuvugizi we wabyemeye ko ari nawe ugomba kubyirengera.
Kanda hano ujye ubona amakuru yihuse kandi kugihe kuri Facebook no kuri twitter
Théoneste@Bwiza.com
