Umugaba Mukuru w’Ingabo za Somalia (SNAF), Major General Odawa Yusuf Rage n’itsinda ry’intumwa ayoboye, kuri uyu wa Kabiri tariki ya 7 Ukwakira basuye Icyicaro Gikuru cy’Ingabo z’u Rwanda kiri ku Cyimihurura.
Umugaba Mukuru w’Ingabo za Somalia n’intumwa ayoboye bari mu Rwanda, mu ruzinduko rw’akazi ruzamara iminsi itandatu. Ni uruzinduko rugamije gushimangira ubufatanye bwa gisirikare busanzwe hagati ya Somalia n’u Rwanda.
Muri uru ruzinduko, Maj. Gen Odawa Yusuf Rage yakoranye inama na Minisitiri w’Ingabo, Hon. Juvenal Marizamunda cyo kimwe n’Umugaba Mukuru w’Ingabo z’u Rwanda, Gen. Mubarakh Muganga.
Minisiteri y’Ingabo z’u Rwanda yatangaje ko uruzinduko rw’Umugaba Mukuru w’Ingabo za Somalia ruri no muri gahunda y’ingabo z’iki gihugu yo gukomeza imikoranire ya gisirikare no gufashanya hagati yazo n’ibihugu bigize Umuryango wa Afurika y’Iburasirazuba. Ni ubufatanye bufatwa nk’ikintu cy’ingenzi mu guhindura inyungu za gisirikare mo amahoro arambye n’ituze ry’akarere mu gihe kirekire.
Umugaba Mukuru w’Ingabo za Somalia na bagenzi be ubwo bari mu nama n’abayobozi b’ingabo z’u Rwanda, bahawe ishusho rusange y’uko umutekano wifashe mu karere, harimo n’umusanzu w’u Rwanda mu gukomeza amahoro n’umutekano muri Afurika.
Izo ntumwa kandi zasuye Urwibutso rwa Jenoside rwa Kigali, aho zunamiye inzirakarengane zazize Jenoside yakorewe Abatutsi mu 1994.
Biteganyijwe ko banazasura inzego zisanzwe zikorana na Minisiteri ndetse n’Ingabo z’Igihugu (MoD/RDF), ndetse n’inzu Ndangamurage y’Urugamba rwo Guhagarika Jenoside.
One Response
ntabwo bavuga Cyimihurura bavuga Kimihurura
mugakosore bwiza turayikunda