Umukinnyi w’umupira w’amaguru wahoze mu ikipe ya Arsenal, Billy Vigar yitabye Imana afite imyaka 21 nyuma yo gukomeretswa bikomeye mu mutwe mu mukino yakinnyemo ku wa Gatandatu ushize.
Uyu musore wakiniraga Chichester City yakomeretse mu mukino wa Isthmian League Premier Division bahuragamo na Wingate & Finchley. Nyuma y’iminota 13 gusa y’umukino, yahise asohorwa mu kibuga, umukino urahagarikwa.
Nk’uko bitangazwa n’umuryango we, Vigar yashyizwe mu bitaro maze bamushyira muri Koma kugira ngo abaganga babashe kumuvura. Ku wa Kabiri yakorewe yarabazewe, ariko ku bw’amahirwe make ntiyashoboye kurokoka, yitaba Imana mu gitondo cyo ku wa Kane, tariki ya 25 Nzeri 2025.
Mu itangazo ry’umuryango ryagiraga riti: “Nubwo twagerageje byose bishoboka, ibikomere yagize byari bikomeye cyane.”
Ikipe ye Chichester City nayo yemeje urupfu rwe ivuga iti: “Tubabajwe cyane no gutangaza urupfu rwa Billy Vigar.”
Billy Vigar yinjiye muri Arsenal Academy afite imyaka 14 mu mwaka wa 2017. Mu 2022 yasinyiye Arsenal amasezerano nk’umukinnyi w’umwuga, aza no kugirwa intizanyo mu makipe ya Derby na Eastbourne Borough. Mu 2024 yerekeje muri Hastings United, mbere yo kwinjira muri Chichester City uyu mwaka.
Mu itangazo rya Arsenal FC rigira riti: “Twababajwe cyane no kumva inkuru y’urupfu rwa Billy Vigar. Yari umusore ufite impano ikomeye, wagiraga ishema ryo guhagararira ikipe yacu kandi ukundwa n’abo bakinanye n’abatoza.”
