Umunya-Tanzania, Dr Faustine Englebert Ndugulile wari umaze amezi atatu atorewe kuyobora Ishami ry’Umuryango w’Abibumbye ryita ku buzima (OMS) muri Afurika, yapfuye.
Urupfu rwe rwemejwe na Perezida Samia Suluhu Hassan, mu butumwa yanyujije ku mbuga nkoranyambaga ze.
Perezida Samia yavuze ko yihanganishije umuryango we n’inshuti ze kandi asaba Imana ngo “iruhutse roho ye aheza”.
Itangazo ry’umukuru w’inteko ishingamategeko ya Tanzania rivuga ko Ndugulile yapfiriye mu Buhinde aho yari amaze iminsi avurirwa, gusa ntiyatangaje indwara yazize.
Dr Ndugulile w’imyaka 55 yari umwe mu bantu bashimwa umuhate mu kurengera ubuzima bw’abantu mu gihugu cye, no mu karere ka Kigamboni ko mu murwa mukuru Dar es Salaam yari ahagarariye mu nteko ya Tanzania.
Muri Kanama uyu mwaka, ni bwo mu nama y’abahagarariye ibihugu bya Afurika muri OMS yabereye i Brazaville muri Congo batoye Dr Ndugulike ngo abe ukuriye iri shami muri Afurika.
Ni umwanya yari yatorewe ahigitse abarimo Dr Mihigo Richard wari watanzwe n’u Rwanda.
Uyu mugabo wigeze kuba Minisitiri w’Ubuzima wa Tanzania yapfuye mu gihe yari ategereje kwemezwa n’inama nkuru y’ubuyobozi bwa OMS izaba muri Gashyantare 2025 i Genève mu Busuwisi, akabona gutangira manda y’imyaka itanu ishobora gutorerwa indi nshuro imwe – nk’umukuru wa OMS muri Afurika.
Dr Tedros Ghebreyesus ukuriye OMS ku isi yanditse ku rubuga X ati: “Ntunguwe kandi mbabajwe cyane no kumenya urupfu rutunguranye rwa Dr Faustine Ndugulile”, yihanganishije umuryango we, inshuti ze, inteko ishingamategeko, n’abaturage ba Tanzania.
Ishami rya OMS rya Afurika naryo ryatangaje ko abarigize bose babajwe n’urupfu rw’uyu wari umaze amezi atatu gusa atowe ngo arikurire.
