Umutwe w’iterabwoba wa Al Shabab watangaje ko umurwanyi wayo wagabye igitero cy’ubwiyahuzi ku birindiro by’ingabo za Somalia bya Janaa Cabdalle gikomoka mu Burundi.
Tariki ya 7 Werurwe 2023, ni bwo iki cyihebe cyagabye igitero cy’ubwiyahuzi muri ibi birindiro, gituritsa imodoka cyarimo. Icyo gihe, Visi Perezida wa Leta ya Jubaland, Muhamud Sayed Aden, yatangaje ko abasirikare batanu bahasize ubuzima, abarenga 10 barakomereka.
Nk’uko umunyamakuru Harun Maruf wa VOA yabitangaje kuri uyu wa 19 Werurwe 2023, Al Shabaab yemeje ko umurwanyi wayo waturikirije imodoka ku birindiro bya Janaa Cabdalle ari Umurundi ukomoka mu ntara ya Gitega witwa Ndayizeye Isaac Khaalid, wari warahawe izina rya ‘Showkaani’.
Harun yagize ati: “Al Shabaab ivuga ko umwiyahuzi waturikirije imodoka ku birindiro by’ingabo za Janaa Cabdalle yari Umurundi ukomoka muri Kibimba. Ivuga ko ari Dnayizeye Isxaaq Khalid aka ‘Showkaani’ wo mu bwoko bw’Abahutu.”
Uyu mutwe w’iterabwoba usobanura ko Ndayizeye yavutse mu mwaka w’1992, akaba yarageze muri Somalia mu myaka irindwi ishize.
