Umutoza w’ikipe ya Liverpool, Jurgen Klopp avuga ko anezejwe n’uburyo arimo guhanganira umwanya wa mbere n’ikipe ya Manchester City, muri shampiyona y’umupira w’amaguru mu Bwongereza.
Jurgen Klopp yatangaje ibi nyuma y’umukino wabaye kuri iki Cyumweru tariki ya 3 Werurwe 2019, ubwo ikipe ye yari imaze kunganya na Everton 0-0. Ubu Man. City iri ku mwanya wa mbere ikaba irusha Liverpool inota rimwe.
Jurgen Klopp yagize ati “Biraryoshye, ariko haracyasigaye imikino myinshi yo gukina. Nshishikajwe n’urugamba ndimo. Narebye umukino w’umunsi wabaye mu ijoro ryakeye mbona ibirori bya Man City- Babonye amahirwe 900 ariko batsinda igitego kimwe. Twiteguye natwe kubona amahirwe nk’ariya”.
Nk’uko bitangazwa na BBC Sports, Klopp avuga ko mu mikino isigaye bagiye gukora ibishoboka byose kugira ngo bazasoze shampiyona bayoboye urutonde, mu gihe ngo na Man city iri ku gitutu kugira ngo igumane iki gikombe yatwaye umwaka ushize.
Urutonde rw’agateganyo rwa shampiyona yo mu Bwongereza, ikipe ya Man City niyo iruyoboye n’amanota 71, Liverpool irayigwa mu ntege na 70, Tottenham Hotspur na 61, Man Utd na 58, Arsenal iza ku wa Gatanu n’amanota 57.
