Bijyanye n’uko Lionel Messi na Cristiano Ronaldo bigaruriye imitima y’abakunzi b’umupira w’amaguru mu ngeri zitandukanye, hari benshi bakwemeza ko aba bagabo ari bo baza imbere mu gutsinda ibitego byinshi ku mipira y’imiterekano (Coup-franc), gusa igitangaje ni uko muri bo nta wuza mu icumi ba mbere batsinze Coup-Franc nyinshi.
Igitangaje ku bakunzi ba Messi na Ronaldo Kandi ni uko hari n’umunyezamu watsinze Coup-Franc nyinshi kurusha aba bombi, nk’uko urubuga Give Me Sport rubitangaza.
Lionel Messi amaze gutsinda Coup-Franc 52 mu mateka ye, mu gihe Cristiano Ronaldo amaze gutsinda 54, gusa aba bombi baracyafite umusozi muremure kugira ngo bazashyikire Umunya Brazil Juninho watsinze nyinshi mu mateka.
Uyu mugabo wahoze akinira ikipe ya Olympique Lyonnais yo mu Bufaransa n’ikipe y’igihugu ya Brazil La Seleção, yatsinze ibitego 77 bya Coup-Franc, akaba akurikirwa ku mwanya wa kabiri na Edson Arantes do Nascimento uzwi nka Pele watsinze Coup-Franc 70.
Umunya Argentine Victor Legrottaglie aza ku mwanya wa gatatu na Coup-Franc 66 amaze gutsinda, anganya n’umunya-Brazil, Ronaldinho Gaùcho wamamaye muri FC Barcelona.
Umwongereza David Beckham aza ku mwanya wa kane na Coup-Franc 65 yatsinze, imbere y’abarimo Diego Armando Maradona watsinze 62, Ronald Koeman utoza ikipe y’igihugu y’u Buholandi watsinze 60 cyo kimwe na Marcelinho Carioca watsinze 59 anganya na Rogerio Ceni wahoze ari umuzamu wa Sao Paulo yo muri Brésil.
Urutonde rw’abakinnyi 10 batsinze Coup-Franc nyinshi mu mateka ya ruhago
1. Juninho – 77
2. Pele – 70
3. Legrottaglie – 66
3. Ronaldinho – 66
5. Beckham – 65
6. Maradona – 62
6. Zico – 62
8. Ronald Koeman – 60
9. Ceni – 59
10. Carioca – 59
