Uwahoze ari Perezida wa Leta Zunze Ubumwe za Amerika, Donald Trump, aragezwa mu rukiko kuri uyu wa Kane, aregwa umugambi wo kugerageza guhindura ibyavuye mu matora yo mu 2020.
Ku mugoroba ubanziriza urwo rubanza, yamaganye uru rubanza avuga ko ari ikimenyetso kigaragaza “ruswa, urukozasoni, & kunanirwa” kwa Amerika ku butegetsi bwa Joe Biden.
Umutekano urimo gukazwa i Washington DC kugira ngo urubanza kuri uyu wa Kane ruze kugenda neza.
Trump asanzwe akurikiranyweho ibindi byaha bibiri mu gihe ateganya kwiyamamariza gusubira muri White House umwaka utaha.
Ariko uru rubanza rujyanye n’amatora rubonwa nk’urukomeye kurusha izindi zose azaburana nk’uko iyi nkuru dukesha BBC ikomeza ivuga.
Ku wa Gatatu, mu nyandiko yanditse ku nyuguti nkuru zose ku rubuga nkoranyambaga rwe, Truth Social, Trump, wari i Bedminster, muri Leta ya New Jersey, muri golf club, yashimiye abayoboke be agira ati: “Sinari narigeze nshyigikirwa cyane ku kintu na kimwe mbere.”
Mu bundi butumwa yibasiye bagenzi be b’Abarepubulikani bashaka guhatanira umwanya w’umukuru w’igihugu ariko batumva ibintu kimwe nawe, barimo uwahoze ari Visi Perezida, Mike Pence na Guverineri wa Florida, Ron DeSantis.
Yongeye gusubiramo ibitekerezo bye avuga ko Pence yari afite uburenganzira bwemewe bwo kubuza Kongere kwemeza intsinzi ya Biden ku itariki ya 6 Mutarama 2021, igikorwa cyahungabanye igihe abashyigikiye Trump bateraga inyubako ikoreramo Inteko Ishinga Amategeko ya Amerika izwi nka Capitol.
Kuri uyu wa Kane, Trump, w’imyaka 77, agomba kwitaba urukiko i Washington DC ku isaha ya saa 16h00 EDT (20:00 GMT). Hitezwe ko ahakana icyaha. Nubwo afite amahitamo yo kugaragara yifashishije ikoranabuhanga, biravugwa ko aza kwitabira imbonankubone.
