Marcelin Cishambo wahoze ari Guverineri w’Intara ya Kivu y’Amajyepfo, kuri uyu wa Gatatu yakiriwe mu mutwe wa M23 urwanya ubutegetsi bwa Repubulika Iharanira Demokarasi ya Congo.
Cishambo yabaye Guverineri wa Kivu y’Amajyepfo kuri ubu ifite igice kinini kigenzurwa na M23 hagati ya 2010 na 2017, ku butegetsi bwa Joseph Kabila Kabange.
M23 yemeje ko yamaze kumwakira biciye mu muvugizi wayo, Lawrence Kanyuka.
Yanditse ku rubuga rwe rwa X ati: “I Goma, ku wa 04 Kamena 2025. Turemeza ko Guverineri w’icyubahiro wa Kivu y’Amajyepfo, Marcelin Cishambo n’itsinda ry’intumwa zigizwe n’abanyapolitiki, abacuruzi abagize opozisiyo na Diaspora bageze i Goma.”
M23 kandi yasabye n’abandi bose bakunda igihugu gutera intambwe nk’iriya.
Marcelin Cishambo yageze i Goma ahasanga Kabila wahoze ari umukoresha we.
Kabila yageze i Goma mu minsi mike ashize avuye muri Afurika y’Epfo, aho yari yarahungiye mu mpera za 2023.
Mbere yo kuza muri uyu mujyi ugenzurwa na M23 yagaragaje ko itonesha rikorwa na Perezida Félix Antoine Tshisekedi, icyenewabo no gukoresha inzego z’igihugu mu nyungu ze biri mu bikomeje gushyira RDC mu bibazo.
