VIDEO: Tugiye gufata iyi ntwaro bicishije abantu bacu aho yaba iri hose – Lt Col Willy Ngoma wa M23

Umutwe wa M23 uri mu ntambara uhanganyemo n’Igisirikare cya Leta ya Repubulika Iharanira Demokarasi ya Congo (FARDC) uratangaza ko kuri ubu uri mu kababaro nyuma y’aho FARDC yishe bamwe mu baturage b’ahitwa Mweso hagenzurwa n’uyu mutwe.

M23 isanzwe ivuga ko mu nshingano zayo harimo no kurinda umutekano w’Abasivile b’aho ugenzura ariko ku wa 25 Mutarama 2024 ntiwashoboye gukora izo nshingano kuko Igisirikare cya Leta ngo cyayinyuze mu jisho kikica abo baturage.

Igitero cyo ku wa 25 Mutarama 2024 i Mweso muri Terirwari ya Masisi cyagabwe hakoreshejwe amabombe na n’ubu bitaramenyekana aho yaturutse, cyahitanye abagera kuri 19 hakomereka abandi 27.

Lt Col Willy Ngoma yagize ati “Amakuru ubu dufite ni ay’akababaro, ni amakuru umuntu wese adashobora kwihanganira yo kubona ukuntu ibintu byifashe mu gace ka Mweso, Ibi bintu twabivuze kuva kera, twamenyesheje isi, umuryango mpuzamahanga, SADC na EAC bose tubereka ibintu ihuriro rya Leta ya Congo riri gukora, ibyo tuba tuvuga ni uku kuntu Leta iri kurasa ku basivile, ku bikorwa remezo nk’amashuri, insengero n’ahandi ariko abantu bose bahisemo kwicecekera, sosiyete sivile yaracecetse”

Yashimangiye ko kuri ubu icyo uyu mutwe ugiye gukora ari “Gufata iyo ntwaro aho yaba iri hose kugira ngo tuyicecekeshe, turayifata mu ntoki zacu kugira ngo itongera kwica abana bacu n’ababyeyi bacu ngo tubabone bapfa… Ibyo badusabye byose birimo no kudusaba guhagarika imirwano twe nka M23 twarabikoze ariko Leta yarabyanze ahubwo ikomeje kwica abantu.”

Uyu mutwe wa M23 uratangaza ibi mu gihe Igisirikare cya Leta cyo cyahise gihakana uruhare rwose muri kiriya gitero, itangazo ryashyizwe ahagaragara Lt Col Njike Kaiko, umuvugizi wa FARDC mu ntara ya Kivu ya Ruguru yavuze ko kiriya gitero cyakozwe na M23 ndetse ngo na RDF.

Icyakora ibyatangajwe na Col Kaiko ntibisobanura icyaba cyarateye M23 kwica Abaturage bari mu gace isanzwe igenzura.