Ikigo cy’Igihugu cy’Ibarurishamibare (NISR), cyatangaje ko mu kwezi gushize kwa Werurwe ibiciro by’ibicuruzwa bitandukanye ku masoko yo mu Rwanda byazamutseho 6,5%, bivuye kuri 6,3% byariho muri Gashyantare.
Ni ibikubiye muri Raporo nshya y’ibiciro ku masoko izwi nka Consumer Price Index (CPI) kiriya kigo cyasohoye kuri uyu wa Gatanu tariki ya 11 Mata 2025.
Iyo raporo ivuga ko izamuka ry’ibiciro ryatewe n’izamuka ry’ibiciro by’ibiribwa n’ibinyobwa, iby’ingendo, amahoteli ndetse n’amaresitora.
Ibiciro mu mijyi
Muri Werurwe 2025, ibiciro mu mijyi byiyongereyeho 6,5% ugereranyije na Werurwe 2024, mu gihe ibiciro mu kwezi kwa Gashyantare 2025 byari byiyongereyeho 6,3%.
Byiyongereye bitewe ahanini n’ibiciro by’ibiribwa n’ibinyobwa bidasembuye byiyongereyeho 6,4%, ibiciro by’ibijyanye n’ubwikorezi byiyongereyeho 12% n’ibiciro by’amafunguro n’icumbi byiyongereyeho 14,1%.
Ugereranyije Werurwe 2025 na Werurwe 2024, ibiciro by’ibintu bitarimo ibiribwa n’ibikomoka ku ngufu byiyongereyeho 5,8%, mu gihe ugereranyije Werurwe 2025 na Gashyantare 2025 byiyongereyeho 1,3%.
Izamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 2,4%.
Ibiciro mu cyaro
Muri Werurwe 2025, ibiciro mu byaro byiyongereyeho 3,9% ugereranyije na Werurwe 2024, mu gihe muri Gashyantare 2025 byari byiyongereyeho 2,2%.
Bimwe mu byatumye ibiciro byiyongera muri Werurwe 2025 ni ibiciro by’ibiribwa n’ibinyobwa bidasembuye byiyongereyeho 2,3% n’ibiciro by’ibinyobwa bisembuye n’itabi byiyongereyeho 6,5%.
Ugereranyije Werurwe 2025 na Gashyantare 2025, ibiciro byiyongereyeho 2,2%.
Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 3,2%.
Ibiciro bikomatanyirijwe hamwe (mu mijyi no mu byaro)
Mu kwezi kwa Werurwe 2025, ibiciro mu Rwanda byiyongereyeho 4,9% ugereranyije na Werurwe 2024, naho mu kwezi kwa Gashyantare 2025 ibiciro byari byiyongereyeho 3,8%.
Bimwe mu byatumye ibiciro byiyongera mu kwezi kwa Werurwe 2025 ni ibiciro by’ibiribwa n’ibinyobwa bidasembuye byiyongereyeho 3,5%, ibiciro by’ibijyanye n’ubwikorezi byiyongereyeho 11,8% n’ibiciro by’amafunguro n’icumbi byiyongereyeho 10,8%.
Ugereranyije Werurwe 2025 na Gashyantare 2025, ibiciro byiyongereyeho 1,9%; izamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 3%.
NISR yagaragaje kandi ko ibiciro by’inzu zo guturamo, amazi, umuriro, gaze n’ibindi bikomoka kuri peteroli byazamutse ku kigero cya 2,6% ubaze ku mwaka mu gihe ku kwezi ho byazamutse ku kigero cya 0,2%.
Ibiciro by’ingendo byiyongereyeho 12% ku mwaka mu gihe ku kwezi ho byiyongereyeho 1,3%.
Ni mu gihe ibiciro bya za resitora n’amahoteli byiyongereyeho 14,1% ku mwaka ariko ku kwezi byiyongera kuri 2,3%.
Umuyobozi w’Ishami ry’Imibare ijyanye n’ubukungu muri NISR, Mwizerwa Jean Claude, yasobanuye ko mu byo kurya byazamutse ugereranyije na Werurwe harimo inyama n’imboga, gusa agaragaza ko izamuka ryabayeho ridakabije bijyanye no kuba rikiri munsi ya 8%.
