AFC-M23 yataye muri yombi umuyobozi wa kaminuza ya ISTGA-GOMA n’ umunyeshuri we

Ku munsi w’ ejo kuwa Kane tariki ya 31 Nyakanga 2025, ubuyobozi bwa  AFC-M23 mu mujyi wa Goma bwataye muri yombi Blaise Wambana, umuyobozi wa porogaramu (chef de section) mu Ishuri Rikuru ryigisha Imiyoborere n’Ubucuruzi rya ISTGA (Institut Supérieur de Techniques de Gestion des Affaires), hamwe n’umunyeshuri we witwa Sanvura Mukandama, wiga mu mwaka wa mbere w’ iyi kaminuza.

Intandaro y’ itabwa muri yombi ry’ uyu muyobozi n’ umunyeshuri we ryakomotse ku gikorw Sanvura Mukandama yari yitabiriye cyo gusobanurira abanyeshuri barangije amashuri yisumbuye amahirwe yo gukomereza muri ISTGA, muri gahunda isanzwe ikorwa buri mwaka nyuma y’irangiza ry’ibizamini bya Leta (Examen d’État).

Ni igikorwa cyari kigamije gukangurira abarangije amashuri yisumbuye kwiyandikisha mu mashuri makuru na kaminuza ari muri iki kigo, ariko, nk’uko amakuru aturuka aho byabereye abitangaza, harabayeho kutumvikana hagati ya Sanvura n’abanyeshuri bo mu rindi shuri.

Ibi byakuruye umwuka mubi n’ amahane hagati y’ ubuyobozi n’ abanyeshuri maze abo banyeshuri bahamagara ubuyobozi bwa AFC-M23, maze abasirikari ba M23 bashinzwe umutekano mu mujyi wa Goma bahita bata muri yombi umunyeshuri witwa Sanvura Mukandama.

Umuyobozi wa Porogaramu, Blaise Wambana, yagerageje kujya kureba icyo yakora ngo umunyeshuri we arekurwe, ariko nawe ahita atabwa muri yombi, ubu bombi bakaba bafungiwe muri komini ya Goma, nk’uko amakuru ava muri iyo kaminuza abitangaza.

Biramenyerewe ko igihe ibizamini bya Leta birangiye, hirya no hino muri Kongo habaho ibikorwa byo kugaragaza ibyishimo cyangwa kwamamaza amashuri makuru abanyeshuri bakwiriye gukomerezamo kuri kaminuza.

Ibyo bikorwa rimwe na rimwe bivamo imyitwarire idakwiye, nk’aho bamwe barangije batwika imyenda, amakaye n’ibitabo nk’igikorwa cyo kwikiza umuvumo w’ibizamini no kuba baruhutse intebe y’ ishuri.

Iyi myitwarire rimwe na rimwe ikurura imvururu, nk’izi zaviriyemo ifatwa ry’umuyobozi n’ umunyeshuri we nubwo ntabiramenyekana ku cyateye ifatwa ryabo n’uko bagiye guhabwa ubutabera cyangwa niba hari abandi bashobora gufatwa nyuma yabo ku bijyanye n’iki gikorwa.