Inama ya kabiri ya Komisiyo ihuriweho ishinzwe Tekinike ya Gisirikare hagati y’u Rwanda na Jordan yasojwe uyu munsi kuwa Kabiri ku cyicaro cya RDF ku Kimihurura mu Mujyi wa Kigali.
Iyi nama yaganiriye ku bijyanye n’ubufatanye hagati y’Igisirikare cy’u Rwanda (RDF) n’Igisirikare cya Jordan nk’uko bigaragara ku rukuta rwa RDF kuri X.
Ibiganiro hagati y’impande zombi byibanze ku kurebera hamwe amahirwe mashya yo kurushaho kunoza ubufatanye buriho.
U Rwanda na Jordan bisanzwe bifitanye ubufatanye hagati ya polisi z’ibihugu byombi.
Mu mwaka ushize wa 2024, uwari Minisitiri w’umutekano w’imbere mu gihugu, Dr. Vincent Biruta n’Umuyobozi Mukuru wa Polisi (IGP) CG Felix Namuhoranye bari muri Jordan mu ruzinduko rw’iminsi 3 rwari rugamije kunoza ubufatanye mu by’umutekano no n’iyubahirizwa ry’amategeko hagati y’ibihugu byombi.
Minisitiri Biruta na mugenzi we w’Ubwami bwa Jordan, Mazin Abudullah Al Farrayeh, bahagarikiye isinywa ry’amasezerano y’ubufatanye hagati ya IGP Namuhoranye na Maj. Gen. Abeidallah A. Maaytah, Umuyobozi w’Umutekano rusange muri Jordan.
Uyu mugango witabiriwe kandi na Ambasaderi w’u Rwanda muri Jordan, Urujeni Bakuramutsa.
Aya masezerano akubiyemo ubufatanye mu kongera ubushobozi harimo amahugurwa; guhanahana amakuru n’ubunararibonye, ubufatanye mu zindi nzego zita ku mutekano nko kurwanya iterabwoba, icuruzwa rya’abantu n’ibiyobyabwenge, ibyaha bikorerwa kuri interineti, n’ibindi.
One Response
imana ishoborabyose ibane n igihugu cyanjye , mw izina rya yesaya Amen.