U Rwanda rugiye gufasha Guinea gukoresha ikoranabuhanga mu itangwa ry’amasoko ya leta

U Rwanda na Guinea byashyize umukono ku masezerano y’ingamba zo kuvugurura no gushyira mu buryo bw’ikoranabuhanga imitangire y’amasoko ya Leta n’imicungire y’imari ya leta muri Guinea .

Nyuma yo gushyira umukono ku masezerano, Eng. Patricie Uwase yagize ati: “Dufite uburambe mu gukoresha ikoranabuhanga mu itangwa ry’amasoko ya leta, by’umwihariko mu bijyanye n’imicungire y’imari ya leta, rero ubwo bunararibonye nibwo tuzanye muri Guinea ngo tuyifashe gukoresha ikoranabuhanga mu itangwa ry’amasoko ya leta. Dufite akazi kenshi ko gukora kandi tumaze gukora akazi kenshi kuri ibyo, uyu munsi rero twasinye amasezerano….”

Ku wa Gatatu, itariki 20 Ugushyingo 2024, nibwo intumwa zaturutse muri Rwanda Cooperation Initiative (RCI), ziyobowe na Eng. Patricie Uwase, Umuyobozi mukuru w’ikigo, zagiranye ibiganiro na Minisitiri w’Intebe wa Guinea, Amadou Oury Bah.

Iyi nama yo mu rwego rwohejuru, yitabiriwe n’abarimo Mourana Soumah, Minisitiri w’Ubukungu n’Imari, na Ambasaderi w’u Rwanda muri Guinea, Michel Minega Sebera, yagaragaje intambwe imaze guterwa mu rwego rw’umushinga w’ikoranabuhanga mu itangwa ry’amasoko ya leta E-Procurement.

Iyi nama ifatwa nk’ikimenyetso cy’ubufatanye bufatika, yari igamije gusuzuma iyi gahunda y’ibikorwa bigamije gushyira mu ikoranabuhanga itangwa ry’amasoko ya Leta muri Guinea.

Ibiganiro byatumye bishoboka kwemeza iterambere rya tekiniki n’ubuyobozi by’umushinga, cyane cyane itangwa ryegereje rya mbere rya module y’urubuga ruzifashishwa, no guhindura ingingo zijyanye no kwemeza ko ruzakora neza.

Muri iyi nama, Minisitiri w’Intebe yishimiye imbaraga zashyizwemo anatanga amabwiriza ahamye kugira ngo gahunda z’ihererekanyabubasha ry’inzego z’imirenge zitangwe ku rubuga guhera muri Mutarama 2025. Aya mabwiriza ashimangira ko guverinoma yiyemeje guteza imbere gukorera mu mucyo no gucunga neza amasoko ya Leta, mu gihe ishimangira ikizere hagati y’abafatanyabikorwa.

Muri urwo rwego, amahugurwa agenewe abantu bashinzwe amasoko ya Leta (PRMP) yatangijwe kuva ku wa Mbere, itariki 18 Ugushyingo 2024. Aya mahugurwa yateguwe ku bufatanye n’abafatanyabikorwa mu bya tekiniki, agamije gutegura abo bizaba bireba kugirango bakoreshe neza urubuga rwa E-procurement no kwemeza ko barwicungira mu buryo burambye.

Ubu bufatanye hagati ya Guinea n’u Rwanda bugaragaza icyifuzo gihuriweho cyo guhanga udushya mu ikoranabuhanga no kuvugurura imikorere y’ubuyobozi. Bihuye neza n’icyerekezo cya Perezida wa Repubulika ya Guinea, Gen. Mamadi Doumbouya, cyo kugira ikoranabuhanga umusemburo w’iterambere n’imiyoborere myiza.